Act 16 | BEF | STEP | Polu Tebe hepato hiti Lisitala hepato hiti heneti'ehina. Ya'mana hepato Hu'mamofitoga komopa'a emito nominana bo gi'a Timoti yabe. Ai ito'afu Yuta a'uba ana huto Hu'mamofitoga komopa'a emito nominana yabe. To ai afo'afu Giliki melugu boya.

Acts 16

Polunogo Silasinogo hiti Timotiu ikoloto bu'ehina

1 Polu Tebe hepato hiti Lisitala hepato hiti heneti'ehina. Ya'mana hepato Hu'mamofitoga komopa'a emito nominana bo gi'a Timoti yabe. Ai ito'afu Yuta a'uba ana huto Hu'mamofitoga komopa'a emito nominana yabe. To ai afo'afu Giliki melugu boya. 2 Asaga Hu'mamofihi naga'amagi Lisitala hepalugu hiti to Ikoniu hepalugu hiti Timoti kumu hetofa pana'i yabe lite fokehi lilata nehana pana'i yabe li'ahana. 3 Polu Timotihi le'moto bilube'mu gufa'a laga hu eto'ehina. Hena'mugope ya'ma pana'mofihi afo'afu Giliki bo mino'ehina'mu luto Yuta bona'i ana hepatoga nehanamagi fegutoga pana'i nohibe lite akeheli'ahana'mu yabe. 4 Enali kapo melete tauniga nebite koyapa'i Yelusale hepatoti olopa bona'magi hiti aposolo bomagi hiti lu epi'ahana kaga Hu'mamofitoga komopa'ani mele'ahana bona'i lu epime lu epime nebite ya'mana kaga lenali mege'i melete minalo lite lu epi'ahana yabe. 5 Ya hilago Hu'mamofihi boana'magi aitoga amuya melete ule'ale hite komopa'ani emite neminago luga'a bona'i ete enalitoga ikele ikele hago asaga yupahi babu bona'i huto hi'ahana yabe.

Polu bamulugu Masetonia melugu bo bu go'ehina

6 Enali Filigia kegi'a hiti Galesia kegi'a hiti folagaha'atigu bi'ahana. Ya hago Sikalafu'uba Esia kegi'a mono ka lu yege mehalabe luto laga hu epolo'ehina yabe. 7 Enali Misia kegi'a hiti bu baga ilete Bitinia hepalugu tilune lite babeyafa hana Yesuhi Sikalafu'auba metilo luto kapo hekini lo epolo'ehina. 8 Ya higo enali Misia kegi'a be ligite Toloasi hepatoga limi'ahana. 9 To ana folugu'i Masetonia bouba ma luto kehe noigo Polu bamu'i bu go'ehina: Kai hege nagamilugu igofa hoto Masetonia bona'i oto lehe'mobo. 10 Polu ya huto bamu'i abu golago lali mele'isi Masetonia biluta kapo'mu sa sa hu'ohuta. Hena'mugope Masetonia bonatoga ka lamana'a lu yege halo luto Hu'mau lali'i kehe noibe lutoti lu keheli'ohuta.

Mone a'i Litiau komopa'a i gelehe hu'ehina

11 To lali Toloasiti he'mito boti monelugu tilenogo ana botiuba lele'moto buto Samotalase aelanigu tiloto o'ehina. To eteha'a lele'moto Niapolisi bu'ehina yabe. 12 To lali ya'mana hepa'i he'miloto Filipai hepalugu heneti'ohuta. Ana hepa'mo koyapa'i Lomu gamaniuba mino'ehina Masetonia kegi'alugu tauni ya'ma sipinamo fato hepa'i be ligi'ehina hepa'i yabe. Lali luga'a kana ya'mana hepato mino'ohuta yabe. 13 Fuli kanagu lali hepaluguti he'mito fegutoga limito nagami beletoga bu'ohuto ya'mana nagami beletoga Yuta bona'magi nunumu hilata nehilana hepa'i ni'ilifi luto bu'ohuta yabe. Lali melugu mino labasu bilototi analo ana'i li gehesa hi'ahana kaga lu epi'ohuta. 14 Ya'mana analuguti mone a'mofihi gi'a Litia yabe luto nohinauba kagati keheli'ehina. Ai Taitaila hepato a'uba safa guketelo bisinisi nomalana a'i yabe. Ai Hu'mamofitogago agoya hu emito nominana'mu luto Sipi Bouba ekesa'a li hokolo higo Polu lina kaga keheliya i'ehina. 15 Ai kaga keheliya ina'mu luto ai'a hiti lalameha'a hiti mono nagami'i fele'ahana yabe. Ai nagami'i afololoto ma luto kaga lu limi'ehina: Nani kumu Sipi Bomofitoga komopaka bati huto emi'ahane lite keheli'ehitemo nani noha'niluga ete minalo. Ya luto ana'uba koyo koyo bito kehe ina'mu luto noha'aluga buto mino'ohuta yabe.

Polu Silasiugo Filipai hepalugu nagalugu mine'aha'ina

16 Mone yupahi nunumu hepato nobunogo kele kele pa'i mone'amofihi foipa fele komopa'agu nominago alihi huto hilinana ya yupahi huto hilibe luto lu huto hulata nohina pa'uba lofo tumala hu'ehina. Ya'mana pa'uba alihi huto hilinanamofihi kaga'a lu huto hulata hinanalo asaga yupahi efahi babu lito kaba bo'amagihi li epilata huto nominana yabe. 17 Ai Polu hiti lali hiti lemege'i lifito nobuto ma luto sipi kehe i'ehina: Ya'ma bo enali ifo muyagu Hu'mamofihi koko pana'a nehabe. Lenali lenugufatini li lenubuto bilabe lite lu yege nehabe. 18 Babu yupahi ya'ma pa'uba ya lumofa'na higo Poluhi kosele'a hago i behe huto ana foipa felemofihi ma luto lu emi'ehina: Yesu Kilisitohi gi'alo kehe nounagi leke ho limito bufa hubo. Ya ligo ana foipa feleuba ana'asilo ana pa'mofihi komopa'aguti mele'isi hele ko limi'ehina. 19 Kaba bo'amagi be gelete aku aku'i efaha'ani lilata nehanana su hago enitaluga logo bigo Polunogo Silasinogo kefefe hite hepa'i folaganugu gamani bona'i nehanalo etele'moto bite ho ti'ahana. 20 Enali etele'mete bite Lomu gamani bo enubulo ho tilete ma lite li'ahana: Ya'mana bole Yuta bole neha'ibe. Etali hepati li sibina neha'ibe. 21 To lali Lomu bona'magita lotiuba mege'i memalalo luto o'e lu'ehina kaga etali lu epimofa'na neha'ibe. Lali Lomu bona'i nohutago etali kaga'atiti mekeheliluta'mu yabe. 22 Ya lago luga'a bona'magi ana hite anagu heleke melete etifisa i'ahana. Ya hago enali Lomu gamani bomagi gukete'atiti toba he etetelete naga osatu etibiyigilo li'ahana. 23 Ya lago naga osatu babu lite etibiyigilete naga'i etimi'ahana. To naga noto kasito gimi gilata bo: Kai le'mo huto kasito gimi bati gibo lite amuya ka li ete'ahana. 24 Ya lite amuya kaga li etana keheliloto ana gimi kaba bouba etele'moto buto naga nohi folagaha'agu ni'ina hasagu etele'mo fitu fo bi'ehina. Ya huloto etigi etayato naga'i giloto lukesalo husoko hu etoto'ehina yabe.

25 To folugu'i Polugo Silasiugo nunumu nama Hu'mamofitoga lite mine'aha'ina. Ya ha'igo luga'a bona'i nagalugu minanamagi kehelite mine'ahana yabe. 26 Ya neha'igo ana'asilo sipi imima'i liloto naga noho lukesa asaga'i li kule kule hu baga i'ehina. Ya nohuto naga noho kasihi asaga'i mele'isi i hokolo hu baga noito nagalugu minana bona'magi enayanugu gi'ahana naga'i asaga'i gulu ho baga i'ehina. 27 Ya hulago naga kasito kaba gimi gi'ehina bouba ho tiloto asaga kasihi hokolo hu su ho'ehigo bu go'ehina. Ya huloto nagalugu bona'mo silaga'i afele su he'ahabe luto lesa'a gofa ligo yatama emita'a li kisito ai'a lubaha'a laga hilube'mu hu'ehina. 28 Ya higo Polu bu goloto sipi kehe i emito ma luto lu'ehina: Lali asaga'i maga nohutagi kaika kugufaka li sibina mehubo. 29 Ya ligo naga noto kaba gimi nogina bouba libi kumu kehe iloto hololu luto hasagu ti'ehina. Ai lesa'a gofa ligo afoya foya iloto Polunogo Silasinogo etigigu tito ko'ehina. 30 Ya huloto Polunogo Silasinogo etele'mo fegutoga mololoto ma luto etoloka ho'ehina: Letali sipi bole, nani hena hinogo'ni Hu'mau nele'mo nubuto bilibe? 31 Ya ligo etali lu emi'aha'ina: Kai Yesutoga komopaka emiletogo Hu'mau kele'mo kubuto binogo ai pana'a lolo hilane. To kai lalamehaka hiti ana hilabe. 32 Ya lilete etali Sipi Bomofihi mono ka'a ai noha'agu nehana bona'i hiti ai'a hiti asaga'i lu epi baga i'aha'ina yabe. 33 Ya ha'igo ana folugu'i naga noto kasito kaba hulata bouba Polunogo Silasinogo fugepa'atiti bito etehepuhi lo'ehinana nagami'i mukoho luto okala hu etoto'ehina yabe. Ya huloto ana'asilo mele'isi lalameha'a hiti asaga'i nagami'i fele'ahana yabe. 34 Alihi Polunogo Silasinogo noha'aluga etele'moto tito nose'na etimigo ne'aha'ina. To ai'a hiti lalameha'a yatai Hu'mamofitoga komopati noemune lite enegelo gofa bi'ahana yabe.

35 Etehi go'i lulago Lomu gamani bomagi gimi bo enoho lifigo ete ma lite li'ahana: Ya'mana bole etele'mo he'mitogo bi'ino. 36 Ya lago naga noto kasito kaba hulata bouba ana kaga buto ma luto Poluhi lu emi'ehina: Lomu gamani bona'magi kai hiti Silasi hiti nagaluguti gulu hete biliyo lite gimi bomagitoga kaga malago lite e'ahana. Ya lanagi letali letipagu fulu hinogo biliyo luto lu etimi'ehina. 37 Ya ligo Polu Lomu gamani bomagi gimi bo'ani ma luto lu epi'ehina: Le'ali Lomu bo nohu'inamo ana'ina mone li sibina hu'ohu'igo legi enali faga lite asaga boana'i li gehesa hite nehana enubulo faga osahi le'emite nagalugu le'ele'mo mele'ahabe. To yatai enali fala kite le'ele'mo he'milune nelafihe? Enali ma'naka lite ya mehilana'mu yabe. Enali'ani ete enayanugati le'ele'mo fegutoga malalana'mu yabe. 38 Polu ya luto ligo gimi bomagi ana kaga lite bite Lomu gamani bomagi lu epi'ahana. To Polugo Silasiugo Lomu bo nohu'ibe la'ina kaga Lomu gamani bomagi kehelilete enelesa'ani gofa lu'ehina. 39 Ya hilete enali Lomu gamani bomagi Polunogo Silasinogo eniginaga ka lu etimilete etele'mo fegu te'ahana. Ya hilete ma hepa'i he'mite bufa hiliyo lite etoho lifi'ahana yabe. 40 Ya hago Polugo Silasiugo naga nonuguti fegutoga limilete Litiaha nonuga bi'aha'ina. Analo Hu'mamofitoga komopa'ani emite minana bona'i Hu'mamofitoga amuya melete komopatini aitogago emite minalo lite amuya kaga lu epilete he'mi epelete bi'aha'ina yabe.